Wasiirka Arrimaha Dibadda Soomaaliya oo Nuqul Ka Mid ah Warqadaha Aqoonsiga Danjirannimo Ka Guddoomay Safiirka Cusub ee UKMuqdisho, 24 May, 2025
Wasiirka Arrimaha Dibadda Soomaaliya oo Nuqul Ka Mid ah Warqadaha Aqoonsiga Danjirannimo Ka Guddoomay Safiirka Cusub ee UK
Muqdisho, 24 May, 2025 – Wasiirka Arrimaha Dibadda iyo Iskaashiga Caalamiga ah ee Jamhuuriyadda Federaalka Soomaaliya, Mudane Cabdisalaan Cabdi Cali, ayaa maanta oo Sabti ah si rasmi ah uga guddoomay magaalada Muqdisho nuqul ka mid ah warqadaha aqoonsiga danjirannimo Safiirka cusub ee Boqortooyada Midowday ee Britain (UK), Mudane Charles King.
Munaasabaddan rasmi ah ayaa ka dhacday xarunta Wasaaradda Arrimaha Dibadda, waxaana ay muujinaysaa bilowga xiriir diblomaasiyadeed oo cusub oo u dhexeeya Soomaaliya iyo Boqortooyada Midowday, iyadoo Safiir Charles King uu yahay wakiilka cusub ee dalkiisa u fadhiya Soomaaliya.
Wasiirka Arrimaha Dibadda ayaa si diirran u soo dhoweeyay Safiirka cusub, isagoo muujiyay sida ay Soomaaliya uga go’an tahay in la xoojiyo xiriirka qotada dheer ee ay la leedahay Boqortooyada Midowday, oo ka mid ah dalalka ay Soomaaliya wadaagto taariikh, danaha istiraatiijiga ah, iyo iskaashi ballaaran oo dhinacyo badan leh. Mudane Cabdisalaan Cabdi Cali ayaa ku bogaadiyay Safiirka xilka cusub ee loo igmaday, wuxuuna u rajeeyay guul iyo horumar uu ka gaaro waajibaadka diblomaasiyadeed ee horyaalla.
Intii ay kulanka ku jireen, labada mas’uul waxay ka wadahadleen muhiimadda ay leedahay in la xoojiyo xiriirka laba geesoodka ah, gaar ahaan dhinacyada amniga, ganacsiga, waxbarashada, caafimaadka, horumarinta dhaqaalaha, iyo la dagaallanka argagixisada. Wasiir Cabdisalaan ayaa carabka ku adkeeyay sida ay muhiimka u tahay in la sii xoojiyo wada shaqeynta labada dowladood, isagoo tilmaamay in xiriirka Soomaaliya iyo UK uu yahay mid waqti dheer soo jiray, isla markaana maraya marxalad horumarineed oo cusub.
Sidoo kale, Wasiirka ayaa u muujiyay Safiirka sida ay dowladda Soomaaliya ugu mahadcelinayso taageerada joogtada ah ee UK ay siisay Soomaaliya, gaar ahaan dhinacyada horumarinta nabadda, dib-u-dhiska hay’adaha dowliga ah, iyo gargaar bini’aadantinimo. Wuxuu sidoo kale xusay in dowladda Soomaaliya ay diyaar u tahay inay si dhow ula shaqeyso Safiirka cusub si loo sii xoojiyo xiriirka labada dal.
Dhankiisa, Safiirka cusub ee Boqortooyada Midowday, Mudane Charles King, ayaa uga mahadceliyay Wasiirka soo dhoweynta diirran iyo kalgacalka uu ku qaabilay. Wuxuu ballan qaaday in uu xoogga saari doono sidii uu u horumarin lahaa xiriirka iyo iskaashiga u dhexeeya Boqortooyada Midowday iyo Soomaaliya, isagoo xusay in dalkiisu diyaar u yahay inuu sii wado taageerada uu siiyo shacabka Soomaaliyeed.
Charles King ayaa sidoo kale muujiyay sida uu ugu faraxsan yahay inuu safiir ka noqdo Soomaaliya, isagoo carabaabay in uu arko fursado badan oo labada dal ka faa’iideysan karaan, gaar ahaan xoojinta iskaashiga dhinacyada nabadgelyada, horumarka iyo kobcinta dhaqaalaha. Wuxuu sheegay inuu si dhow ula shaqeyn doono dowladda Soomaaliya si loo gaaro himilooyinka guud ee labada dhinac.
Ugu dambeyntii, kulankan ayaa ahaa mid muujinaya sida ay labada dal uga go’an tahay in ay sii wadaan xiriirkooda wanaagsan, ayna si wadajir ah uga shaqeeyaan arrimaha danaha guud leh. Munaasabaddan ayaa lagu tilmaamay mid muhiim ah oo daahfur u ah wajigii cusub ee iskaashiga iyo saaxiibtinimada Soomaaliya iyo Boqortooyada Midowday.
Wasiirka Arrimaha Dibadda ayaa ku celiyay ballanqaadka dowladda Federaalka Soomaaliya ee ah inay si buuxda ula shaqeyn doonto Safiirka cusub, isagoo rajo wanaagsan ka muujiyay in xiriirka labada dal uu noqon doono mid miro dhal ah oo dan u ah labada shacab.
